NO SMOKING!!!

           

No Smoking… nakalimabag sa mamalaking pulang letra at may kasamang takaw atensyong larawan ng sigarilyong may ekis na pula o kaya nama’y sigarilyong umuusok na nasa loob ng pulang bilog na may palihis na guhit na pula, indikasyon na bawal ito.Eh bakit may mga naninigarilyo pa rin sa mga lugar na mayroong ganitong paskil?!

        Hindi ko maintindihan kung hindi ba marunong magbasa o sadyang hindi marunong umintindi ang karamihan sa atin. Halos murahin na ng karatulang nakapaskil na bawal magtapon ng basura, doon pa rin nagtatapon… sinabihan na bawal mag-ingay mag-iingay pa rin… may nakasulat nang bawal umihi pero doon pa rin mapanghi kase doon pa rin umiihi!!! Hindi lang ba marunong magbasa at umintindi o sadyang pasaway lang tayo at talagang kulang sa disiplina?

        Naranasan mo na bang sumakay sa dyip na maraming sticker at mga nakasabit na paalala tulad ng “BAYAD MUNA BAGO BUMABA” at “BARYA LANG SA UMAGA”? may bago na rin ngayon, lahat ng pampublikong sasakay nilalagyan na ng LTFRB ng sticker na may “NO SMOKING” kase nga ang mga dyip at bus ay mga pampublikong sasakyang ginagamit ng 90% ng mga pinoy sa pang-araw-araw na transportasyon, eh paano kung mismong si manong drayber ang naninigarilyo sa harap mismo ng sticker? Hindi ba nakakainit ng ulo na mabugahan ka ng usok lalo na kung kakalabas mo lang ng bahay, bagong ligo ka at pusturang pustura papasok sa trabaho o eskwela? Yung mahabang buhok nga ng babaeng kasakay mo sa dyip na ayaw ipitan na sumasampal sayo habang nabyahe nakakabwisit na eh, paano pa kaya yung mama o drayber na nakaupo sa unahan ng dyip na parang tambuchong buga ng buga ng usok?!

Ang sarap nilang dikitan ng sticker sa noo!!!

      Papasok ako sa trabaho isang beses, maaga pa naman kung tutuusin pero maarte kase ako, ayokong dumarating ng late, gusto ko mga trenta minutos bago ang shift ko nasa opisina na ko. Yung drayber ng dyip, hindi ko maintindihan ang trip. Tumitigil sya sa lahat ng kanto at pinaparahan lahat ng tao sa daan. Pinipilit nyang pasakayin sa dyip nya pati yung mga nakatambay na lalaking walang pang itaas na damit at naghihimas ng tiyan. Papara naman ang kahit na sino kung gusto talagang sumakay eh, di ba? Kaya hindi ko talaga maintindihan kung bakit kailangang tumigil maya’t maya at mamilit ng mga tao para sumakay kahit siksikan na sa loob ng dyip at para nang sardinas ang mga pasahero… naiintindihan kong naghahanapbuhay ang mga drayber at kailangan nilang makaboundery pero sana lang meron ding kahit konting konsidirasyon  para sa mga pasahero, kaya nga sumasakay ng dyip para mapabilis ang byahe eh hindi para malula sa init dahil siksikan at patigil tigil ang  byahe… at ang pinakanakakagigil sa lahat? Patigil tigil na nga yung dyip, mainit na nga kase siksikan kayo, maninigarilyo pa yung drayber!!!Anak ng engkanto talaga?! Parang nagpapausok ng tinapa!! Bago ka makarating sa pupuntahan mo aatakihin ka muna sa puso dahil sa kunsumisyon sa walang konsiderasyong drayber ng dyip na kung pwede mo lang batukan nabatukan mo na!!

      Malaking porsyento ng populasyon ng Pilipinas ay naninigarilyo, sumubok manigarilyo at sunog na ang baga sa kakasigarilyo. Kung tutuusin wala akong karapatan ururatin ang mga taong naninigarilyo dahil ako mismo ay smoker, moderate smoker… ang kaibahan ko nga lang sa ibang tao, hindi ako naninigarilyo sa mga lugar na may nakasulat na NO SMOKING. Achievement na para sa’kin ang hindi ko paghawak at pagtikim ng yosi magdadalawang buwan na mula ngayon.

         Nagtuto akong gumamit nito noong third year highschool… lunchbreak ‘yon umuwi yung iba naming kaeskwela,yung ibang malayo ang bahay may baon at hindi umuuwi sa tanghali, whole day kase ang pasok naming noon… pagkakain ng tanghalian, tinuruan ako ng isa kong kaklase sa loob pa mismo ng classroom, sa loob mismo ng campus, wala naman kaseng teacher na makakakita kase nga lunchbreak at sa isang pampublikong eskwelahang may halos dalawang libong mag-aaral mula first year hanggang fourth year kulang na kulang ang mga guro para mabantayan ang bawat mag-aaral… kaya hindi na nakakataka na maagang namumulat ang mga mag-aaral sa mga ganitong bagay kahit sabihin pang may cigarette ban sa mga tindahang malapit sa mga eskwelahan… sabi ng kaklase ko ilalagay ko lang ang sigarilyo sa labi ko at hihigupin ang usok mula dito, patatagalin ng konti sa loob ng bibig at saka ilalabas. Inubo ako pagkatapos ng dalawang hithit buga. Hindi ko binigyang pansin ang sigarilyo noong mga panahong iyon kase nga naman mas busy ako makipagkumpetensya ng grade sa mga kaklase ko, kasama kase ako sa section 1, star section kung baga, halos kalahati ng klase nerd, at kasama ako dun… mas malamang ang aral kesa laro, pagsasayaw at pagsusulat sa school paper lang ang alam kong gawin maliban sa paggawa ng homework at reports pero ibang usapan ang college… mas maluwag ang schedule… mas maraming pwedeng gawin sa loob at labas ng campus… mas may kalayaan ka sa lahat ng bagay… walang pakealaman… idagdag pa ang mga bagong kabarkadang mas gustong magsaya kesa pumasok sa klase… mahirap aminin pero totoo… muntik na masayang ang buhay ko nung college ako… may mga pagkakataong imbis na gumawa ng project at mag-aral, bote ang pinagpupuyatan naming magkakaklase… magpapaalam sa bahay para magresearch kuno pero pupunta lang sa bahay ng kaklase para manuod ng pelikula, uminom ng pulang kabayo at syempre manigarilyo. Hindi lang basta pagsisigarilyo ang ginagawa naming noon… chain smoking… hindi pa ubos ang isang stick nagsisindi na ng kapalit… yosi adik… sunog baga… kinailangan kong tumigil sa pag-aaral dahil nagkaroon ng problemang pinansyal ang mga magulang ko pero kapag binabalikan ko ang mga panahong nasa eskwela ako naiisip kong nakabuti na rin siguro ang paghinto ko dahil napalayo ako sa barkada at mga kalokohan. Ewan ko pero ito ilang beses ko ng tinangkang kalimutan ang sigarilyo pero parang syang multong hindi mamatay-matay… two years ago may halos pitong buwan akong hindi humawak ng lighter at stick ng yosi, achievement na ‘yon para sa’ken kase unti-unti nagagawa kong bitawan ang bisyo na sa palagay ko’y kung di ko titigilan ay ikakamatay ko sa batang edad. Walang nangyari, nastress ako sa trabaho wala akong magawa, wala akong makausap kaya bumili din ako ng isang pack ng sigarilyo para makakwentuhan…balik sa dati… yosi pagkakain… yosi pag batrip… yosi habang umiinom… yosi kapag trip… hindi na chain gaya ng dati pero nagyoyosi pa rin… ito ngayon pinipilit ko na namang kalimutan si pareng Marlboro, dalawang buwan na halos kameng hindi naguusap. Mahirap iwanan ang bagay na nakasanayan… mahirap kalimutan ang mga Gawain na nakakapagpalimot sayo ng mga problema at hung ups mo sa mundo… parang pagpaparehab ng mga adik sa bato… parang hindi paginom ng alak ng mga alcoholic… parang paghihiwalay sa mga magkasintahang inlababo… parang ako…

     Pero mabalik tayo sa ibang smoker… may smoking area naman di ba? Bakit hindi muna magtiis na hindi manigarilyo at hintaying makarating sa tamang lugar para makapanigarilyo? Sa mga drayber naman siguraduhing walang pasahero sa minamanehong sasakyan bago humipak ng yosi para walang maabalang ibang tao. Masarap ang pakiramdam kapag ikaw ang naninigarilyo pero talaga naming nakakagalit kapag ikaw ang binubugahan at nakakalanghap ng lahat ng usok mula sa sigarilyo ng isang taong walang pakealam sa mundo. Hindi na nga malinis ang hangin sa Pilipinas dadagdagan pa ang polusyon ng sigarilyo ng  katabi mong mamang may tattoo… badtrip!

     Oo nga pala, ang bagong upong lider ng Bansa ay smoker… nagyoyosi kaya sya sa tamang lugar? Naranasan nya na kayang mabugahan ng usok ng sigarilyo habang bumabyahe? Eh mapuwing ng titiis mula sa sigarilyo ng ibang tao? Maliban sa paghuli sa mga illegal na gumagamit ng wangwang ipapahuli nya rin kaya nya ang mga naninigarilyo sa mga PUV? Kung makakakita ba ang mga simpleng mamamayan ng mga walang pakundangang naninigarilyo sa dyip, bus, tricycle, pedicab, sa mall at iba pang pampublikong lugar pwede kayang isumbong sa pulis na isa pa namang violator ng mga ganitong batas o pwede na lang isumbong sa office of the President? Sana hindi lang basta sticker ang ilagay sa mga sasakyan at eskwelahan… dapat yung sticker nananampal ng mga lumalabag sa batas na ito o kaya naman sisigawan nung sticker yung taong magyoyosi sa harap nito para mapahiya o para mas simple sana maglagay ang lokal na pamahalaan ng mga manghuhuli sa mga taong makakapal talaga ang mukha na hindi makaintindi ng NO SMOKING!

     Oo, smoker ako pero alam ko ang ibig sabihin ng NO SMOKING! Ikaw alam mo rin ba? O katulad ka rin nila?